ch. 9
Ep.9.1
Hic extremo tempore imperator apud Mantineam
cum acie instructa audacius instaret hostes, cognitus
a Lacedaemoniis, quod in unius pernicie eius patriae
sitam putabant salutem, universi in unum impetum
fecerunt neque prius abscesserunt, quam magna caede
edita multisque occisis fortissime ipsum Epaminondam
pugnantem, sparo eminus percussum, concidere viderunt.
Ep.9.2
huius casu aliquantum retardati sunt Boeoti,
neque tamen prius pugna excesserunt, quam repugnantes profligarunt.
Ep.9.3
at Epaminondas, cum animadverteret mortiferum se vulnus accepisse simulque,
si ferrum, quod ex hastili in corpore remanserat, extraxisset, animam statim emissurum, usque eo retinuit,
quoad renuntiatum est vicisse Boeotos.
Ep.9.4
id postquam audivit, satis' inquit 'vixi: invictus enim morior.' tum
ferro extracto confestim exanimatus est.